భక్తి శ్రద్ధలతో సాగిన ప్రత్యేక పూజలు
నేటిసూర్య ప్రతినిధి:
నూతన సంవత్సరాది ఉగాది పర్వదినం సందర్భంగా చర్లలోని చిన్న ఇంద్రకీలాద్రిపై వెలసిన శ్రీ విజయ కనకదుర్గ అమ్మవారి ఆలయం భక్తులతో కళకళలాడింది. పండుగ శోభ మధ్య నిర్వహించిన ప్రత్యేక కార్యక్రమాలు ఆలయానికి మరింత వైభవాన్ని తెచ్చాయి.
కొత్తపల్లి శ్రీనివాసరావు దంపతులు అమ్మవారికి లక్షరూపాయల విలువైన కవచాలను సమర్పించి తమ అచంచల భక్తిని చాటుకున్నారు. ఆలయ అర్చకులు దుర్గాప్రసాద్ ఆధ్వర్యంలో ముందుగా కవచాలను శాస్త్రోక్తంగా పూజించి, అనంతరం అమ్మవారికి కవచాలంకరణ చేసి మల్లెపూలతో అద్భుతంగా అలంకరించారు. ఈ దర్శనం భక్తులను ఆధ్యాత్మిక ఆనందంలో ముంచెత్తింది.
కొత్తపల్లి శ్రీనివాసరావు దంపతులు గతంలో కూడా ఆలయ అభివృద్ధి, పూజా కార్యక్రమాలకు విశేష సహకారం అందిస్తూ భక్తులలో ఆదర్శంగా నిలుస్తున్నారు. వారి సేవాభావం పట్ల భక్తులు హర్షం వ్యక్తం చేశారు.
ఉగాది సందర్భంగా ఆలయంలో ప్రత్యేక అభిషేకాలు, అర్చనలు, హారతులు నిర్వహించగా పెద్ద సంఖ్యలో భక్తులు తరలి వచ్చి అమ్మవారి ఆశీర్వాదాలు పొందారు. ఆలయ ప్రాంగణం పూలతో, దీపాలతో అలంకరించబడటంతో పండుగ వాతావరణం అలుముకుంది.ఈ కార్యక్రమం ద్వారా ఉగాది పర్వదినం ఆధ్యాత్మిక ఉత్సాహంతో, భక్తి పరవశంతో ఘనంగా జరుపుకున్నారు.
