భద్రాద్రి కొత్తగూడెం జిల్లా చర్ల మండలం జి.పి.పల్లి గ్రామంలో నూతనంగా నిర్మించిన గ్రామ పంచాయతీ భవనం ఘనంగా ప్రారంభమైంది. ఈ కార్యక్రమానికి ముఖ్య అతిథిగా హాజరైన భద్రాచలం ఎమ్మెల్యే తెల్లం వెంకటరావు రిబ్బన్ కట్ చేసి భవనాన్ని ప్రారంభించారు. పూలతో, ఆకులతో అలంకరించిన నూతన భవనం వద్ద జరిగిన ఈ కార్యక్రమం ఉత్సాహభరిత వాతావరణంలో సాగింది.
ప్రారంభోత్సవానికి గ్రామస్తులు, మహిళలు, యువత పెద్ద సంఖ్యలో హాజరై కార్యక్రమాన్ని విజయవంతం చేశారు. ఎమ్మెల్యే తెల్లం వెంకటరావు ప్రజలతో కలిసి మాట్లాడి వారి సమస్యలను తెలుసుకున్నారు. గ్రామాభివృద్ధి దిశగా ప్రభుత్వం చేపడుతున్న కార్యక్రమాలపై ఆయన వివరించారు.
అనంతరం గ్రామ సర్పంచ్ ఇర్పా ఉమ, ఉప సర్పంచ్ గగ్గూరి సాంబశివరావు లకు శాలువాలు కప్పి ఎమ్మెల్యే ఘనంగా సన్మానించారు. గ్రామ అభివృద్ధికి వారు చేస్తున్న కృషిని అభినందిస్తూ, నూతన పంచాయతీ భవనం గ్రామ ప్రజలకు సేవలందించే కేంద్రంగా మారుతుందని ఆయన తెలిపారు. ప్రజలకు అవసరమైన పత్రాలు, సేవలు ఇకపై సులభంగా అందుబాటులో ఉంటాయని అన్నారు.
ఈ సందర్భంగా ఎమ్మెల్యే మాట్లాడుతూ గ్రామీణాభివృద్ధి కోసం ప్రభుత్వం ప్రత్యేక శ్రద్ధ తీసుకుంటోందని, మౌలిక వసతుల కల్పనతో గ్రామాలను అభివృద్ధి పథంలో నడిపిస్తామని తెలిపారు. పంచాయతీ వ్యవస్థ బలపడితేనే గ్రామాలు అభివృద్ధి చెందుతాయని ఆయన అన్నారు.
