భద్రాద్రి కొత్తగూడెం జిల్లా ,చర్ల మండలంలోని మారుమూల ఆదివాసీ గ్రామాలు ఒకప్పుడు అభివృద్ధికి నోచుకోక దూరంగా ఉన్న గ్రామాలుగా పేరుపొందాయి. ప్రాథమిక సదుపాయాల కొరత, విద్యా వైద్య సౌకర్యాల లేమి, యువతలో అవగాహన లోపం వంటి అనేక సమస్యలు అక్కడి ప్రజలను వెనుకకు నెట్టేవి. అయితే ఇప్పుడు ఆ పరిస్థితి మారుతోంది. ఈ మార్పుకు కారణంగా నిలుస్తున్నది చర్ల పోలీసుల సేవా స్పూర్తి.
చర్ల సీఐ రాజు వర్మ , ఎస్సైలు నర్సిరెడ్డి , కేశవ్ గార్లు “మౌలిక వసతుల కల్పన ద్వారానే గ్రామాల అభివృద్ధి సాధ్యం” అనే దృక్పథంతో ముందుకు సాగుతున్నారు. వారు కేవలం చట్ట అమలు పరిరక్షకులుగానే కాకుండా, సమాజ నిర్మాణంలో భాగస్వాములుగా మారి ఆదివాసీ పల్లెల్లో మార్పు తీసుకువస్తున్నారు.
గ్రామాల్లో రహదారులు, తాగునీరు, విద్యుత్ వంటి అవసరాలను గుర్తించి వాటి మెరుగుదలకు కృషి చేయడంతో పాటు, విద్య మరియు ఆరోగ్యంపై ప్రత్యేక దృష్టి సారిస్తున్నారు. పిల్లలు పాఠశాలలకు వెళ్లేలా ప్రోత్సహించడం, వైద్య శిబిరాల ద్వారా ఆరోగ్యంపై అవగాహన కల్పించడం వంటి కార్యక్రమాలు నిర్వహిస్తున్నారు.
ఇక యువతను అసాంఘిక కార్యకలాపాల నుంచి దూరంగా ఉంచడం కోసం క్రీడలను ప్రోత్సహిస్తున్నారు. గ్రామాల్లో క్రీడా పోటీలు నిర్వహిస్తూ, యువతలో ఆత్మవిశ్వాసాన్ని పెంపొందిస్తున్నారు. అలాగే అవగాహన సదస్సుల ద్వారా సమాజానికి దగ్గరయ్యే మార్గాన్ని చూపిస్తున్నారు.
అడవుల్లోకి వెళ్లిన మావోయిస్టులను కూడా తిరిగి సమాజంలోకి తీసుకురావాలనే ఉద్దేశంతో పలు కార్యక్రమాలు చేపడుతున్నారు. వారిని జనజీవన స్రవంతిలో కలిపేందుకు అవగాహన సదస్సులు, పునరావాస కార్యక్రమాలు, ఉపాధి అవకాశాల కల్పన వంటి చర్యలు చేపట్టడం అభినందనీయంగా నిలుస్తోంది.
ఈ చర్యల వల్ల ఆదివాసీ ప్రాంతాల్లో గణనీయమైన మార్పులు కనిపిస్తున్నాయి. ప్రజల్లో పోలీసులపై విశ్వాసం పెరిగింది. యువతలో సానుకూల దృక్పథం పెరిగి, విద్యపై ఆసక్తి పెరుగుతోంది. గ్రామస్తులు కూడా ఈ మార్పును సంతోషంగా స్వాగతిస్తున్నారు.
“పోలీసులు అంటే భయం కాదు, భరోసా” అనే భావనను కలిగిస్తూ, సమాజానికి అండగా నిలుస్తున్న చర్ల పోలీసుల సేవలు నిజంగా ఆదర్శప్రాయంగా నిలుస్తున్నాయి. ఈ సేవా కార్యక్రమాలు నిరంతరం కొనసాగితే, మారుమూల ఆదివాసీ పల్లెలు కూడా అభివృద్ధి పథంలో ముందంజ వేయడం ఖాయం అని స్థానికులు ఆశాభావం వ్యక్తం చేస్తున్నారు.
