కాలువ పూడుకుపోయి రోడ్డుపైకి చేరుతున్న తాలిపేరు నీరు.
చర్ల, నేటిసూర్య ప్రతినిధి: తాలిపేరు ప్రాజెక్టు నుంచి రైతుల పంట పొలాలకు అందాల్సిన సాగునీరు కాలువ పూడుకుపోవడంతో వృథాగా పోతుండటంపై చర్ల మండలం, రాళ్లగూడెం గ్రామ రైతులు, గ్రామస్తులు ఆందోళన వ్యక్తం చేస్తున్నారు. గ్రామంలోని కాలువ తూర చెత్తాచెదారం, మట్టి పేరుకుపోవడంతో పూర్తిగా పూడుకుపోయి నీటి ప్రవాహానికి ఆటంకం ఏర్పడింది. దీంతో పంట పొలాలకు చేరాల్సిన సాగునీరు కాలువ నుంచి బయటకు వచ్చి ప్రధాన రహదారిపైకి పొంగిపొర్లుతూ వృథాగా పోతున్న పరిస్థితి నెలకొంది.
ఇప్పటికే వర్షాలు ఆశించిన స్థాయిలో లేకపోవడంతో పంటల సాగు కోసం రైతులు సాగునీటి కోసం ఎదురుచూస్తున్నారు. ఈ తరుణంలో తాలిపేరు ప్రాజెక్టు నుంచి వస్తున్న నీటిని సక్రమంగా పొలాలకు మళ్లించాల్సిన కాలువలు పూడుకుపోవడంతో రైతులకు తీవ్ర ఇబ్బందులు ఎదురవుతున్నాయని వారు ఆవేదన వ్యక్తం చేస్తున్నారు. ఒకవైపు పంటలకు నీరు అందక ఇబ్బందులు పడుతుండగా, మరోవైపు అందుబాటులో ఉన్న నీరు కాలువల నిర్వహణ లోపంతో రోడ్డుపైకి చేరి వృథాగా పోతుండటం పట్ల రైతులు అసంతృప్తి వ్యక్తం చేస్తున్నారు.
కాలువలో చెత్తాచెదారం, మట్టి పేరుకుపోవడంతో నీరు ముందుకు వెళ్లక రహదారిపై ప్రవహిస్తోంది. దీంతో రహదారిపై ప్రయాణించే వాహనదారులకు కూడా ఇబ్బందులు ఎదురవుతున్నాయని గ్రామస్తులు చెబుతున్నారు. రోడ్డుపై నీరు నిలిచి ప్రవహించడం వల్ల ప్రమాదాలు జరిగే అవకాశం ఉందని, అధికారులు వెంటనే స్పందించకపోతే పరిస్థితి మరింత తీవ్రంగా మారే ప్రమాదం ఉందని వారు ఆందోళన వ్యక్తం చేస్తున్నారు.
తక్షణమే కాలువను శుభ్రం చేయాలి.
రాళ్లగూడెం గ్రామంలోని రైతుల పంట పొలాలకు సాగునీరు సక్రమంగా చేరేలా కాలువలో పేరుకుపోయిన మట్టి, చెత్తాచెదారాన్ని తొలగించి నీటి ప్రవాహానికి ఆటంకం లేకుండా చర్యలు చేపట్టాలని రైతులు కోరుతున్నారు. ఇరిగేషన్ అధికారులు క్షేత్రస్థాయిలో పరిశీలించి కాలువ పూడికతీత పనులను వెంటనే చేపట్టి, తాలిపేరు ప్రాజెక్టు నుంచి విడుదలవుతున్న నీరు వృథా కాకుండా నేరుగా రైతుల పంట పొలాలకు చేరేలా శాశ్వత ఏర్పాట్లు చేయాలని కోరుతున్నారు.
రైతుల సాగునీటి సమస్యను దృష్టిలో ఉంచుకుని అధికారులు ఇకనైనా స్పందించి కాలువ మరమ్మతులు, శుభ్రత పనులను అత్యవసరంగా చేపట్టాలని గ్రామస్తులు కోరుతున్నారు. అలాగే రహదారిపైకి నీరు చేరకుండా తగిన చర్యలు తీసుకుని వాహనదారులకు, ప్రజలకు ప్రమాదాలు తలెత్తకుండా చూడాలని వారు విజ్ఞప్తి చేస్తున్నారు.
