చర్ల పోలీస్ క్రీడా మైదానంలో జిల్లా స్థాయి అథ్లెటిక్స్ సెలెక్షన్స్ ప్రారంభం.
క్రీడల అభివృద్ధికి పోలీసుల ప్రోత్సాహం అభినందనీయం: అథ్లెటిక్స్ అసోసియేషన్.
చర్ల, ఆగస్టు 18, నేటిసూర్య : చర్ల పోలీస్ క్రీడా మైదానంలో జిల్లా స్థాయి అథ్లెటిక్స్ సెలెక్షన్స్ ఉత్సాహభరిత వాతావరణంలో ప్రారంభమయ్యాయి. జిల్లాలోని వివిధ ప్రాంతాల నుంచి ప్రతిభ కలిగిన క్రీడాకారులు ఈ సెలెక్షన్స్కు హాజరై తమ క్రీడా ప్రతిభను ప్రదర్శించారు. యువ క్రీడాకారుల్లో ఉత్సాహాన్ని నింపుతూ చర్ల పోలీస్ స్టేషన్ ఎస్హెచ్ఓ ఆలెం రాజు వర్మ, ఎస్ఐ నర్సిరెడ్డి, జిల్లా అథ్లెటిక్స్ అసోసియేషన్ జిల్లా సెక్రటరీ కె. మహీధర్ తదితరులు ఒలింపిక్ పతాకాన్ని ఊపి పరుగుపందెం పోటీలను ప్రారంభించారు.
ఈ సందర్భంగా క్రీడాకారులు ఎంతో ఉత్సాహంతో పోటీల్లో పాల్గొని తమ ప్రతిభను చాటుకున్నారు. పరుగు పందెంతో పాటు అథ్లెటిక్స్లోని వివిధ విభాగాల్లో ప్రతిభ కనబరిచిన క్రీడాకారులను రాష్ట్ర స్థాయి పోటీలకు ఎంపిక చేయనున్నారు. జిల్లా స్థాయి సెలెక్షన్స్లో ప్రతిభ కనబరిచి విజేతలుగా నిలిచే క్రీడాకారులు ఈ నెల 26, 27 తేదీల్లో వరంగల్లో జరగనున్న రాష్ట్ర స్థాయి అథ్లెటిక్స్ పోటీల్లో పాల్గొనేందుకు అర్హత సాధించనున్నారు.
క్రీడాకారులకు చర్ల పోలీస్ గ్రౌండ్ వరం
ఈ సందర్భంగా జిల్లా అథ్లెటిక్స్ అసోసియేషన్ జిల్లా సెక్రటరీ కె. మహీధర్ మాట్లాడుతూ.. జిల్లా హెడ్క్వార్టర్స్లో ఉన్న క్రీడా మైదానాలను మినహాయిస్తే ఇలాంటి అత్యుత్తమ సౌకర్యాలతో కూడిన మైదానం మరెక్కడా అందుబాటులో లేదని ప్రశంసించారు. చర్ల పోలీస్ క్రీడా మైదానంలో నిర్మించిన 400 మీటర్ల ట్రాక్ అండ్ ఫీల్డ్ అథ్లెటిక్స్ పోటీల నిర్వహణకు ఎంతో అనువుగా ఉందని తెలిపారు.
గ్రామీణ ప్రాంతాల్లో ప్రతిభ కలిగిన అనేక మంది క్రీడాకారులు ఉన్నప్పటికీ సరైన మైదానాలు, శిక్షణ, ప్రోత్సాహం లేక తమ ప్రతిభను నిరూపించుకునే అవకాశం కోల్పోతున్నారని, చర్లలో ఇలాంటి అత్యుత్తమ క్రీడా మైదానం అందుబాటులోకి రావడం ఎంతో అభినందనీయమని అన్నారు. చర్ల ప్రాంత క్రీడాకారులకు ఈ మైదానం మంచి వేదికగా నిలుస్తుందని పేర్కొన్నారు.
సీఐ రాజు వర్మకు ప్రత్యేక అభినందనలు.
క్రీడల అభివృద్ధికి, యువతను ప్రోత్సహించేందుకు చర్ల పోలీస్ శాఖ చూపిస్తున్న చొరవ అభినందనీయమని మహీధర్ అన్నారు. ప్రత్యేకంగా చర్ల పోలీస్ క్రీడా మైదానాన్ని క్రీడాకారులకు అందుబాటులోకి తీసుకురావడంలో కీలకంగా వ్యవహరిస్తున్న చర్ల సీఐ ఆలెం రాజు వర్మకు అభినందనలు తెలిపారు. అలాగే ఎస్ఐలు నర్సిరెడ్డి, కేశవ్లకు, పోలీస్ శాఖకు మరియు క్రీడాకారులకు సహకరిస్తున్న చర్ల ప్రజలకు కృతజ్ఞతలు తెలిపారు.
క్రీడాకారులు తమ ప్రతిభను నిరూపించుకునేందుకు అవసరమైన వాతావరణాన్ని కల్పించడం ద్వారా పోలీసులు ప్రజలకు మరింత చేరువవుతున్నారని పలువురు అభిప్రాయపడ్డారు. పోలీస్ గ్రౌండ్ను కేవలం పోలీసుల శిక్షణకే పరిమితం చేయకుండా స్థానిక యువత, క్రీడాకారులకు ఉపయోగపడేలా అందుబాటులో ఉంచడం వల్ల చర్ల ప్రాంతంలో క్రీడా సంస్కృతికి మరింత ప్రోత్సాహం లభిస్తుందని పేర్కొన్నారు.
రాష్ట్ర స్థాయిలో సత్తా చాటాలి.
జిల్లా స్థాయి సెలెక్షన్స్లో పాల్గొన్న క్రీడాకారులకు అధికారులు, కోచ్లు పలు సూచనలు చేశారు. క్రమశిక్షణ, పట్టుదల, నిరంతర సాధనతో ముందుకు సాగితే రాష్ట్ర, జాతీయ స్థాయిలో కూడా చర్ల ప్రాంతానికి మంచి పేరు తీసుకురావచ్చని అన్నారు. జిల్లా స్థాయిలో ఎంపికయ్యే క్రీడాకారులు వరంగల్లో జరిగే రాష్ట్ర స్థాయి పోటీల్లో అత్యుత్తమ ప్రతిభ కనబరిచి విజయం సాధించాలని ఆకాంక్షించారు.
ఈ కార్యక్రమంలో పీడీ ఈశ్వర్, శ్రీను, ఏఎస్ఓ పీడీ కె. వెంకటనారాయణ, జిల్లా అథ్లెటిక్స్ కోచ్లు నాగరాజు, ప్రసాద్, పీఈటీ రవీందర్, ఇతర కోచ్లు, క్రీడాకారులు, పోలీస్ సిబ్బంది తదితరులు పాల్గొన్నారు.
