మండల స్థాయి వాలీబాల్ టోర్నమెంట్ ప్రారంభం .
సారధ్యం వహిస్తోన్న చర్ల పోలీసులు
చర్ల, నేటిసూర్య ప్రతినిధి:
మారుమూల ఏజెన్సీ ప్రాంతాల్లోని యువత ప్రతిభను వెలికి తీసేందుకే పోలీసుల ఆధ్వర్యంలో ఈ క్రీడా పోటీలు నిర్వహిస్తున్నామని అడిషనల్ ఎస్పీ ఆపరేషన్స్ పరితోష్ పంకజ్ వెల్లడించారు. ఛత్తీస్గడ్ రాష్ట్రం సరిహద్దు ఏజెన్సీ గ్రామాల నుండి కూడా పెద్ద సంఖ్యలో జట్లు పాల్గొంటాయని ఆశాభావం వ్యక్తం చేశారు. జిల్లా ఎస్పీ రోహిత్ రాజు ఆదేశాల మేరకు మావోయిస్టు ప్రభావిత ప్రాంతాల్లో నివసించే యువత ప్రతిభను బయటకు తీసుకొచ్చేందుకు చర్ల పోలీసుల ఆధ్వర్యంలో బుధవారం నుండి మూడు రోజుల పాటు మండల స్థాయి వాలీబాల్ పోటీలు ప్రారంభించారు. చర్ల పోలీస్ స్టేషన్లో ఏర్పాటు చేసిన ఈ టోర్నమెంట్ ప్రారంభోత్సవ కార్యక్రమానికి ముఖ్య అతిథిగా అడిషనల్ ఎస్పీ ఆపరేషన్స్ పంకజ్ పరితోష్ తోపాటు భద్రాచలం ఏఎస్పి విక్రాంత్ కుమార్ సింగ్ పాల్గొన్నారు. ఈ టోర్నమెంట్లో ఇప్పటివరకు 49 గ్రామాల జట్లు నమోదు చేసుకున్నాయి. ఇందులో జిల్లాకు సరిహద్దులో ఉన్న చత్తీస్గడ్ రాష్ట్ర గ్రామాల్లో క్రీడాకారులను కూడా ఆహ్వానించారు. ఈ సందర్బంగా ఆయన మాట్లాడుతూ ఏజెన్సీ ప్రాంతాల్లో నివసించే యువత చదువుతో పాటు క్రీడల్లో కూడా రాణించాలని అన్నారు. యువత చాలా మంది రక రకాల కారణాలతో చదువును మధ్యలోనే ఆపేసి పనులు చేసుకుంటూ బ్రతుకుతున్నారని అన్నారు. చదువుతోపాటు క్రీడల్లో రాణిస్తూ తమ ప్రాంతానికి మంచి పేరు తీసుకొచ్చి ప్రత్యేక గుర్తింపు సాధించాలని సూచించారు. క్రీడాకారులందరూ క్రీడా స్ఫూర్తితో ముందుకు సాగాలని, గెలుపోటములు సహజమన్నారు. ఏజెన్సీ ప్రాంతంలో పుట్టి పెరిగి ఇటీవల మహిళల క్రికెట్లో తనదైన శైలిలో ప్రతిభను కనబరిచి టీమ్ ఇండియా వరల్డ్ కప్ సాధించేలా కృషి చేసిన గొంగిడి త్రిషను అందరూ ఆదర్శంగా తీసుకోవాలని అన్నారు. ఏజెన్సీ ప్రాంతాల్లో నివసించే యువత వారి ప్రతిభను చాటుకునేందుకుకు జిల్లా ఎస్పీ నేతృత్వంలో ఇలాంటి కార్యక్రమాలను చేపట్టడం జరుగుతుందని తెలిపారు. విద్య, వైద్యం రవాణా వంటి సౌకర్యాలను కల్పించేందుకు ఏజెన్సీ ప్రాంత ప్రజల కోసం జిల్లా పోలీసు శాఖ ఎంతగానో కృషి చేస్తుందని అన్నారు. అనంతరం భద్రాచలం ఏఎస్పి విక్రాంత్ కుమార్ సింగ్ ఐపిఎస్ మాట్లాడుతూ… ఈ పాంతాల్లోని యువత చెడు వ్యసనాలకు దూరంగా ఉండాలని, పోలీసు వారు చేపట్టే అభివృద్ధి, సంక్షేమ కార్యక్రమాలకు సహకరిస్తూ వారి భవిష్యత్తును అందంగా తీర్చిదిద్దుకోవాలని సూచించారు.
